Laugardagur 28. júlí kl. 16

SUMARKVEÐJA - ÍSLENSKAR KÓRPERLUR

Söngflokkurinn Hljómeyki

Stjórnandi: Marta Guðrún Halldórsdóttir

Söngflokkurinn Hljómeyki flytur íslenskar kórperlur undir stjórn Mörtu Guðrúnar Halldórsdóttur. Tónleikarnir bera yfirskriftina Sumarkveðja en á efnisskrá eru verk eftir mörg okkar þekktustu tónskáld m.a. Atla Heimi Sveinsson, Þorkel Sigurbjörnsson, Báru Grímsdóttur, Snorra Sigfús Birgisson, Hildigunni Rúnarsdóttur og Emil Thoroddsen.

 

EFNISSKRÁ

 

Ingi T. Lárusson                                               Sumarkveðja

                                                                                 Páll Ólafsson

Emil Thoroddsen                                            Hver á sér fegra föðurland

                                                                                 Hulda 

Emil Thoroddsen                                              Mitt er ríkið

úts. Hugi Guðmundsson                              Guðmundur Guðmundsson

Sigfús Einarsson                                             Ég á það heima

                                                                                 Hulda 

Jón Ásgeirsson                                                Hjá lygnri móðu

                                                                                    Vorvísa                                                               

                                                                                  Halldór Laxness

                                                                                  Úr leikritinu Hús skáldsins

                                                                               

Atli Heimir Sveinsson                                    Við svala lind – Madrigaletto I

                                                                                    Sem dökkur logi – Madrigaletto II

                                                                                  Oddur Björnsson                                                                                                                                              Úr leikritinu Dansleikur

Þorkell Sigurbjörnsson                                 Til þín, Drottinn hnatta og heima

                                                                                  Páll V. G. Kolka  

Þóra Marteinsdóttir                                        Nú legg ég þér í lófa

                                                                                  Julie Hausman

                                                                                  Þýðing: Sigurbjörn Einarsson                                                                      

Bára Grímsdóttir                                               María, drottins liljan

                                                                                  Höfundur óþekktur    

      Einsöngur: Elín Arna Aspelund

 

Hildigunnur Rúnarsdóttir                             Syngur sumarregn

                                                                                  Hildigunnur Halldórsdóttir
                                                                                  Einsöngur: Hildigunnur Rúnarsdóttir

                                                                                     Gleðin

                                                                                  Þorsteinn Valdimarsson

 

Snorri Sigfús Birgisson                                 Afmorsvísa 

                                                                                  Páll Vídalín 

                           

Árni Harðarson                                                  Tíminn líður trúðu mér

                                                                                  Þjóðvísa

 

Það fór saman hérlendis að sjálfstæðishugsjón óx fiskur um hrygg og evrópsk sönghefð skaut rótum. Skáld ortu kvæði sem tjáðu ættjarðarást og áttu að blása fólki frelsisanda í brjóst og þessi kvæði voru sungin, fyrst einkum við erlend lög. En eftir því sem fleiri Íslendingar nutu klassískrar tónlistarmenntunar fjölgaði þeim einnig sem sömdu lög í þjóðlegum, rómantískum stíl eins og tíðkaðist ytra. Þar fór fremstur í flokki Sigfús Einarsson dómorganisti, kórstjóri og annar útgefenda Fjárlaganna svokölluðu, söngvasafns sem speglar einkar vel þá vakningu í söngmennt sem einkenndi aldamótakynslóðina. Lagið Ég á það heima samdi Sigfús við erindi úr ljóðinu Heim eftir skáldkonuna Huldu en það birtist í fyrstu ljóðabók hennar árið 1909. Löngu síðar vann Hulda til verðlauna í samkeppni í tilefni af lýðveldisstofnuninni 1944 fyrir ljóðið Hver á sér fegra föðurland. Emil Thoroddsen samdi við það lag sem hefur æ síðan verið einn vinsælasti ættjarðarsöngur Íslendinga. Mitt er ríkið, sem Emil samdi við ljóð Guðmundar Guðmundssonar skólaskálds, er minna þekkt en það er óskandi að ný útsetning Huga Guðmundssonar verði til þess að vekja athygli á þessu fallega lagi.

 

Þeir Jón Ásgeirsson, Atli Heimir Sveinsson og Þorkell Sigurbjörnsson fæddust allir í konungsríkinu Íslandi – á því skeiði er Ísland var fullvalda ríki í konungssambandi við Danmörku. Það var einnig blómaskeið skáldsagnahöfundarins Halldórs Laxness sem á fjórða áratugnum sendi frá sér hvert stórvirkið á fætur öðru, meðal annars Heimsljós, söguna um skáldið Ólaf Kárason. Lögin tvö eftir Jón Ásgeirsson voru samin árið 1981 fyrir Hús skáldsins, leikgerð Sveins Einarssonar upp úr verkinu sem sýnd var í Þjóðleikhúsinu. Madrigalar Atla Heimis Sveinssonar eru einnig leikhústónlist, samdir fyrir leikrit Odds Björnssonar, Dansleik, en það var frumsýnt í Þjóðleikhúsinu í ársbyrjun 1974. Þorkell Sigurbjörnsson var, eins og þeir Jón og Atli Heimir, fjölhæft tónskáld en er ef til vill kunnastur meðal almennings fyrir sálmalög sín sem sum eru meðal ástsælustu tónsmíða íslenskrar tónlistarsögu. Til þín drottinn hnatta og heima, samið við kvæði læknisins Páls Kolka, er prýðisdæmi um tök Þorkels á forminu.

 

Síðasti hluti efnisskrárinnar er helgaður verkum tónskálda sem fædd eru á lýðveldistímanum. Þau Bára Grímsdóttir, Snorri Sigfús Birgisson og Árni Harðarson velja sér (mis)fornan kveðskap til þess að tónsetja. Þýður þrískiptur danstaktur ræður ríkjum í Maríubæn Báru en taktskipti setja á hinn bóginn skemmtilegan svip á Afmorsvísu Snorra Sigfúsar og Árni býr íslensku þjóðlagi sömuleiðis hressilegan búning. Þóra Marteinsdóttir á hér einkar fallega bæn og það er ósvikin sumarbirta í tónsmíðum Hildigunnar Rúnarsdóttur.

 

Yfirskrift tónleikanna er sótt til Sumarkveðju Austfirðinganna Páls Ólafssonar og Inga T. Lárussonar. Segja má að hún sé hér eins konar músíkölsk kveðja frá Austurlandi til dala Borgarfjarðar og er það vel við hæfi í upphafi efnisskrár sem ætlað er að fagna aldarafmæli fullveldis Íslands.

 

Góða skemmtun!

Svanhildur Óskarsdóttir

FYLGSTU MEÐ OKKUR 
  • Facebook B&W
  • White Instagram Icon