Þórunn Ósk Marínósdóttir og Sigurður Bjarki Gunnarsson eru listrænir stjórnendur Reykholtshátíðar. Þau hafa bæði starfað um árabil við hljóðfæraleik og komið fram með fjölmörgum tónlistarhópum og á ýmsum tónlistarhátíðum – meðal annars margsinnis á Reykholtshátíð. Þau eru bæði fastráðnir hljóðfæraleikarar hjá Sinfóníuhljómsveit Íslands þar sem Þórunn leiðir einnig víóludeild hljómsveitarinnar og eru einnig stofnfélagar og leika með Strokkvartettinum Sigga. Þau starfa jafnframt við hljóðfærakennslu – Sigurður Bjarki hjá Listaháskóla Íslands en Þórunn bæði hjá Menntaskóla í tónlist og Listaháskóla Íslands.