Reykholt er einn merkasti sögustaður landsins. Frægast er Reykholt vegna búsetu Snorra Sturlusonar frá árinu 1206 þar til hann var veginn árið 1241. Snorri mun vera grafinn í Sturlungareit svokölluðum í Reykholtskirkjugarði. Í Reykholti er forn laug, Snorralaug, þar sem Snorri er talin hafa setið og hvílt sig frá skriftum.

​

Stytta af Snorra Sturlusyni er á hlaðinu fyrir framan skólabyggingu Héraðsskólans. Hún var gerð af Gustav Vigeland og gefin af Ólafi, þáverandi krónprins og síðar konungi Norðmanna árið 1947.

​

Héraðsskóli var reistur í Reykholti 1931 og ber aðalbygging hans fagurt vitni um handverk arkitekts hennar, Guðjóns Samúelssonar. Þar eru einnig tvær kirkjur og er sú eldri reist á árunum 1886-1887. 

 

Jarðhiti er mikill í Reykholti og er hann notaður til upphitunnar gróðurhúsa, sundlaugar og annarra bygginga á staðnum. Tveir hverir eru þar helstir, Skrifla og Dynkur. Var vatni veitt í Snorralaug úr Skriflu eftir um 120 m löngum stokki og er baðlauga í Reykholti oft getið í gömlum heimildum. Snorralaug er með elstu mannvirkjum sem varðveist hafa hér á landi. Frá lauginni lágu jarðgöng til bæjarhúsa Snorra Sturlusonar og hafa þau verið grafinn upp að hluta.

Heimild: vesturland.is o.fl.