Hljómeyki var stofnað árið 1974. Sönghópurinn hefur frá upphafi verið í fremstu röð íslenskra kóra og tekist á við afar fjölbreytt verkefni, allt frá kórmúsík endurreisnarinnar til rokktónlistar. Árið 1986 tók Hljómeyki upp samvinnu við Sumartónleika í Skálholti sem stóð í þrjá áratugi og frumflutti hópurinn á þeim tíma tugi verka eftir mörg helstu tónskáld landsins. Kórinn tekur iðulega þátt í öðrum hátíðum sem helgaðar eru nýrri tónlist og hann hefur undanfarin ár átt farsælt samstarf við Listaháskóla Íslands um flutning á verkum útskriftarnemenda. Þá hefur Hljómeyki gefið út sex geisladiska með verkum eftir íslensk tónskáld, þau Hjálmar H. Ragnarsson, Þorkel Sigurbjörnsson, Báru Grímsdóttur, Jón Nordal og Sigurð Sævarsson.

Hljómeyki hefur tekið þátt í flutningi á óperunum Dídó og Eneas eftir Purcell, Orfeus og Evridís eftir Gluck, Orfeo eftir Monteverdi, La Clemenza di Tito eftir Mozart, Carmen eftir Bizet og Porgy og Bess eftir Gershwin. Síðastnefndu verkin söng kórinn með Sinfóníuhljómsveit Íslands en Hljómeyki hefur komið reglulega fram með hljómsveitinni á undanförnum árum, síðast á tónleikunum Klassíkin okkar, haustið 2019. Þá hefur kórinn komið fram með hljómsveitunum Todmobile, Sólstöfum, Dimmu, Skálmöld og Dúndurfréttum.

Hljómeyki hefur frumflutt nokkur stór verk hér á landi, til dæmis Náttsöngva Rakhmanínovs, Kórkonsert Schnittkes, Púshkínsveig Svírídovs og Path of Miracles eftir Joby Talbot sem kórinn flutti nú síðast á tónleikum í Kristskirkju í upphafi ársins 2020.

Erla Rut Káradóttir, stjórnandi

​

Stjórnandi Hljómeykis er Erla Rut Káradóttir. Erla stundaði nám í söng og píanóleik frá unga aldri og síðar orgelleik. Hún lauk kirkjuorganistaprófi frá Tónskóla Þjóðkirkjunnar árið 2015 og BA-gráðu í kirkjutónlist frá Listaháskóla Íslands árið 2020 þar sem eitt af aðalfögum hennar var kórstjórn. Kennarar hennar í kórstjórn voru m.a. Magnús Ragnarsson og Hörður Áskelsson. Hún hefur fjölbreytta reynslu af kórastarfi, bæði hefur hún sjálf sungið í kórum og sem stjórnandi og meðleikari. Auk þess hefur hún lokið BA-gráðu í mannfræði. Hún er organisti í Tjarnaprestakalli í Hafnarfirði og Vatnsleysuströnd.